БДП со раст од 2,1 процент во првото годинешно тримесечје

Бруто домашниот производ забележал стапка на раст од 2,1 процент на крајот од првото годинешно тримесечје, покажуваат податоците на Државниот завод за статистика.

Во тој перод поголем раст е регистриран во неколку сектори. Кај градежништвото се работи за стапка од 12,7 проценти, а во трговија на големо и трговија на мало; поправка на моторни возила и мотоцикли; транспорт и складирање; објекти за сместување и сервисни дејности со храна – 10,6 проценти.

Финалната потрошувачка на домаќинствата, вклучувајќи ги непрофитните институции кои им служат на домаќинствата, во првите три месеци номинално расте за 14,8 насто, а нејзиното учество во структурата на бруто-домашниот производ изнесува 69 проценти, наведено е во информацијата на ДЗС.

Номинално зголемување од 13,7 проценти има и кај извозот на стоки и услуги. Додека, пак, кај увозот на стоки и услуги има намалување во номинален износ од 1,4 отсто.

Исто така, статистиката покажува дека бруто-инвестициите во првото тримесечје од годинава бележат намалување во делот на промената на залихите.