Банките стабилни, солвентноста на највисоко ниво во последните 18 години – Квартален извештај на Народната банка

Банките во државата се стабилни, располагаат со солидна депозитна база која е во можност да го одржува забрзаниот раст на кредитите. Платежната способност, изразена преку достигнатата стапка на адекватност на капиталот е на највисоко ниво од 2006 година. Ова се основните податоци од кварталниот извештај за ризиците во банкарскиот сектор, разгледан и усвоен од Советот на Народната банка. Оттаму и оцената дека во вториот годинешен квартал банкарскиот сектор ја задржал стабилноста и ја подобрил солвентноста.

Банките работеа во поповолно домашно макроекономско окружување, во време кога геополитичкиот контекст сѐ уште е нестабилен и создава неизвесност и зголемени ризици за следниот период. Притоа, во овој квартал растот на депозитите на банките беше поумерен, но тој и натаму е солиден и овозможува одржување на кредитниот раст, којшто малку забрза во вториот квартал од годината, пишува во извештајот.

Воедно, платежната способност на банките на долг рок да одговорат на обврските и натаму бележи тренд на подобрување. Што влијае на нивната способност да се снајдат и да одговорат на евентуални неповолни влијанија и состојби.

„Стапката на адекватност на капиталот достигна ниво од 19%, коешто е највисоко од 2006 година наваму. Задржувањето на добивките остварени во минатата година овозможи натамошно зајакнување на капиталните позиции на банките, додека безмалку 40% од сопствените средства на банкарскиот систем отпаѓаат на заштитните слоеви на капиталот или се ‘слободни’ над потребното минимално ниво и може да се употребат за покривање на неочекуваните шокови и загуби. Повисоките показатели за солвентноста главно се темелат на распределбата на добивкaта од минатата година, а во голема мера се поддржани и од повисоките регулаторни и супервизорски барања за одржување повисок капитал од страна на банките, што пред сѐ е поврзано со заштитните слоеви на капиталот и капиталниот додаток утврден врз основа на супервизорска оцена“.

Освен тоа, очекувањата се дека солвентноста и натаму ќе напредува.

„Имајќи предвид дека Народната банка во неколку наврати најави зголемување на противцикличниот заштитен слој на капиталот, што ќе почне да се применува во наредниот период, се очекува дека солвентноста на банкарскиот систем и натаму ќе се подобрува“.

Ликвидноста на банкарскиот систем и натаму е на задоволително ниво, профитабилноста се подобри, но побавно од лани, додека кредитното портфолио на банките го задржа квалитетот. Спроведените стрес-тестирања покажуваат отпорност на банкарскиот систем на симулираните шокови.

„Општо земено, и во вториот квартал од 2024 година банкарскиот сектор ја задржа својата стабилност, со подобрена солвентност, добра ликвидност и задржан квалитет на кредитното портфолио. Сепак, условите и натаму се неизвесни, а ризиците за светската и домашната економија на краток и на среден рок сѐ уште постојат. Оттука, потребна е натамошна претпазливост во управувањето со ризиците и во водењето на политиките, а Народната банка е подготвена да ги употреби сите неопходни инструменти и да презема соодветни мерки со коишто ќе се придонесе за задржување на стабилноста на девизниот курс, ценовните нивоа и на банкарскиот сектор“, порачуваат од Советот на Народната банка.