АЛАРМ ОД ЌАФАСАН: Вратени над 10 тони јагнешка кожа од Албанија

Во услови на зголемени здравствени ризици во регионот, граничните контроли стануваат првата линија на одбрана за заштита на домашното производство и јавното здравје. Во моментов навремена интервенција спречи потенцијален ризик да влезе или транзитира низ земјава.

Официјалните ветеринари на Агенцијата за храна и ветеринарство на граничниот премин Ќафасан открија и вратија пратка од над 10 тони јагнешка кожа со потекло од Република Албанија, која требало да транзитира низ Македонија.

Одлуката за враќање на пратката е донесена во согласност со превентивните мерки што се применуваат поради појавата на болеста чума кај мали преживари во соседната земја. Станува збор за сериозна заразна болест која може да предизвика значителни штети во сточарството, поради што институциите постапуваат со зголемена претпазливост.

Од Агенцијата информираат дека со оваа реакција уште еднаш е потврдено високото ниво на подготвеност и професионалност на службите на терен, кои континуирано вршат засилени контроли на граничните премини.

Во време кога ризиците од прекугранично ширење на болести се зголемени, ваквите мерки се клучни за спречување на евентуални последици врз домашното сточарство и безбедноста на храната. Од АХВ нагласуваат дека остануваат целосно посветени на својата улога – заштита на здравјето на граѓаните и сигурноста на домашното производство.