„АКО ИМАШ ПАРИ ДА ЈА РЕНТАШ ВЕНЕЦИЈА, ПЛАЌАЈ ПОГОЛЕМИ ДАНОЦИ“: Гринпис и гневните Венецијанци ја изреметија ВИП „Свадбата на векот“

Џеф Безос наводно бил принуден да ги премести настаните на својата свадба во Венеција откако жителите се заканиле дека ќе ги наполнат градските канали со пластични крокодили на надувување за да ги спречат гостите да пристигнуваат. Свадбата на мултимилијардерот основач на Амазон, Џеф Безос, и новинарката Лорен Санчез беше планирана да се одржи во објект од 16.век во центарот на градот, како дел од повеќедневните прослави за неговата свадба почнувајќи од денес, 24 јуни па се до крајот на викендот.

Сепак, двојката сега го преместува настанот на побезбедна локација по заканите од протести од жителите кои го обвинуваат дека ефикасно ја затворил Венеција. Милијардерот технолошки магнат и неговата свршеница одредиле локација во Канареџо за да прослават по нивната венчавка, популарна и централна област за ноќен живот, но стравот од демонстрации довел до промена на планот, додадоа изворите.

Според извештаите, свадбата ќе биде преместена во Арсенале, огромен комплекс од бродоградилишта, базени, магацини и канали каде што Венецијанците со векови граделе воени бродови и трговски бродови. До 18 век, тоа бил најголемиот индустриски комплекс во Европа.

Опкружен со назабени ѕидови, Арсенале ќе биде многу полесен за обезбедување од Скуола Гранде дела Мисерикордија, која има лесен јавен пристап.

Свадбата на Безос и Санчез, на која се најавени бројни ВИП личности од светот на модата, филмската индустрија, бизнисот и политиката, ги мобилизираше активистичките групи кои протестираат против неа како знак на растечката нееднаквост меѓу богатите и оние што немаат, како и за непочитување на жителите на градот.

Околу десетина венецијански организации – вклучувајќи застапници за домување, активисти против крстосувачките бродови и универзитетски групи – се обединија за да протестираат против повеќедневниот настан под слоганот No Space for Bezos  „Нема простор за Безос“, игра на зборови што се однесува и на неодамнешниот вселенски лет на невестата.

Тие организираа протести од мал обем, развевајќи транспаренти против Безос на познатите венецијански локации. Оваа недела им се придружија и активистичката организација Гринпис и британската група „Сите го мразат Елон“, која кршеше Тесла автомобили во знак на протест против Елон Маск, за да развеат огромен транспарент на плоштадот Свети Марко во знак на протест против наводните даночни олеснувања за милијардерите.

„АКО МОЖЕШ ДА ЈА ИЗНАЈМИШ ВЕНЕЦИЈА ЗА ТВОЈАТА СВАДБА, МОЖЕШ ДА ПЛАТИШ ПОВЕЌЕ ДАНОК“, пишуваше на транспарентот на Гринпис, на кој имаше огромна слика од Безос. Полицијата брзо го одзеде.

Локалните активисти планираа поорганизиран протест за сабота, со цел да го попречат пристапот до каналите со чамци за да ги спречат гостите да стигнат до местото за свадба. Потоа го модифицираа протестот во марш од железничката станица откако прогласија победа, тврдејќи дека нивниот притисок ги принудил организаторите да го променат местото во Арсенале, полесно обезбедено место надвор од пренатрупаниот центар на Венеција.

„Тоа ќе биде силен, решителен протест, но мирен“, рече Федерика Тонинело, активистка од мрежата на Собрание за социјално домување. „Сакаме да биде како забава, со музика, за да биде јасно како сакаме да изгледа нашата Венеција“.

Меѓу 200-те гости за кои е потврдено дека ќе присуствуваат на свадбата се Мик Џегер, Иванка Трамп, Опра Винфри, Кети Пери и Леонардо Дикаприо.

Венеција, позната по своите романтични погледи на каналите, е домаќин на стотици свадби секоја година, не ретко и оние на богатите и славните. Претходните свадби на познати личности, како онаа на Џорџ Клуни со адвокатката за човекови права Амал Аламудин во 2014 година, беа прифатени од јавноста. Стотици излегоа да им посакаат среќа на двојката во Градското собрание.

Безос има различен политички и бизнис профил, рече Томасо Качари, истакната личност во движењето кое успешно се залагаше за забрана за крстосувачки бродови над 25.000 тони што патуваат низ каналот Џудека во централна Венеција.

„Безос не е холивудски актер“, „Тој е ултрамилијардер кој седеше до Доналд Трамп за време на инаугурацијата, кој придонесе за неговиот реизбор и придонесува на директен и голем начин за овој нов глобален хаос.“

Критичарите, исто така, ги наведуваат работните практики на Амазон, тековните даночни спорови со европските влади и политичките здруженија на Безос како дополнителни причини за загриженост.

Лука Заја, претседател на регионот Венето што го опфаќа градот, ги критикуваше протестите, велејќи дека 90-те приватни авиони што ги превезуваат гостите до блиските аеродроми ќе донесат приходи до 48 милиони евра за локалните бизниси.

Ќерката на американскиот претседател Доналд Трамп, Иванка, и зетот Џаред Кушнер, кои беа на одмор во Тоскана, ја посетија фабриката на производителот на луксузни спортски автомобили Ферари на пат кон свадбата во Венеција, изјави извор запознаен со нивните движења.

(Фото: Greenpeace)