Во голема акација уапсени се хакери кои украле 100 милиони долари во криптовалути

Европската полициска агенција – ЕВРОПОЛ позната како агенција за криминалистичко разознавање во Европската унија, денеска соопшти дека учествувала во апсење на десетмина осомничени за кражба на криптовалути во износ од 100 милиони американски долари преку системот „размена на СИМ картички“ што им овозможил на осомничените пристап до телефоните на нивните жртви.

Во вчерашната акција, вкупно осуммина криминалци беа лишани од слобода како резултат на меѓународната истрага за неколку хакерски напади врз познати јавни личности во Соединетите Американски Држави, по претходното апсење на две лица на Малта и во Белгија, кои припаѓале на оваа криминална мрежа.

„Оваа банда за организиран криминал беше насочена кон илјадници жртви во САД во текот на 2020 година, вклучувајќи познати личности, спортски sвезди, музичари и нивните семејства, а се верува дека криминалците украле над 100 милиони долари во криптовалути, откако нелегално добиле пристап до нивните телефони“, се наведува во соопштението на Европол.

Европол нагласи – група од десетина криминалци работеле заедно за да пристапат до телефонските броеви на жртвите и да ги сменат лозинките за да ја преземат контролата над нивните апликации или налози, што им овозможило да украдат пари, криптовалути и лични податоци.

„Апсењата се извршени по истрагата спроведена во соработка со Велика Британија, САД, Белгија, Малта и Канада“, соопшти Европол.