АКЦИИ СО НАЈГОЛЕМ ПОРАСТ И ПАД – Кој има +36,24%, а кој -56,52%?
3 мин читање985 прегледи
„РЖ Техничка контрола“, едно од друштвата кои произлегоа од некогашната скопска „Железара“, ја има акцијата која бележи највисок месечен раст на вредноста. Во јунскиот билтен на Македонска берза се запишани плус 36,24 проценти. Од 367 денари во мај, просечната цена на акцијата издадена од компанијата која прави физичко-хемиски и металуршки испитувања од областа на индустријата, рударството и металургијата, пораснала на 500 денари.
На 31 мај, акцијата на прилепскиот Мермерен комбинат имала просечна цена од 2.575 денари. Еден месец подоцна, на 30 јуни, се искачила на 3.200 денари. Или, акцијата на Комбинатот, кој е најпрепознатлив по сивецот, се зголемила за 24,27 насто.
Убедливо најтргуваната акција на берзата ја има и на оваа топ 5 табела. Месечното движење по нагорна линија е 19,5 проценти. Акцијата на Комерцијална банка на последниот ден од мај била со просечни 18.158,99 денари, а на крајот од јуни – 21.699,66 денари.
Уште една прилепска компанија, овојпат од областа на прехранбената индустрија, е меѓу оние чија акција се издвојува по порастот на вредноста. Акцијата на „Витаминка“ од мајските 10.010 денари се поместила на јунските 10.999. Тоа значи дека просечната цена зајакнала за 9,88 проценти.
Во друштвото на позитивните е и акцијата на „Тетекс“ од Тетово. Петтата позиција ја обезбеди со растот од 7,14 насто. Конкретно, акцијата на некогашниот текстилен гигант во мај чинела 2.800 денари, а еден месец подоцна има просечна вредност од 3.000 денари.
Предводник на табелата со предзнак минус е акцијата на „челичната“ компанија. За повеќе од половина, односно за 56,52 отсто се намалила вредноста на акцијата од „Либерти“. Од 46 денари во мај, во јуни се спуштила на 20 денари.
Следна е хартијата од вредност на компанијата – „состојка на секоја градба“. Акцијата на „Адинг“ на 31 мај имала просечна цена од 1.690 денари, а на 30 јуни од 1.600 денари. Според податоците од берзанскиот билтен, се работи за минус од 5,33 проценти.
На средината од оваа листа е акцијата на најстарата македонска осигурителна компанија, со намалувањето за 3,61 отсто. Или, акцијата на „Македонија осигурување – Виена Иншуренс Груп“ на крајот од јуни имала просечна цена од 1.200 денари, откако еден месец претходно била на нивото од 1.245 денари.
На последните две места овојпат се позиционирани банкарски акции.
ЕКСКЛУЗИВНО: ЗА НАЈПРОФИТНИТЕ ИЗВРШИТЕЛКИ СЕКОЈА ГОДИНА ПО ДВА Стана
Иако е меѓу најтргуваните, сепак, акцијата на НЛБ банка влегла во негатива. Во мај берзанската статистика забележала просечни 40.213,62 денари. Во јуни вредноста на акцијата се намалила на 38.900 денари. Станува збор за пад од 3,27 проценти.
Најниското меѓу овие со најголемо намалување е регистрирано кај акцијата на УНИ банка. Минусот е 2,74 отсто. Просечната цена во мај изнесувала 6.940 денари. Во јуни опаднала на 6.750 денари.
М.А.