Акции на „Тиквеш“ купени во блок со цена 128 насто над пазарната

Во 402 акции на Винарската визба „Тиквеш“ се вложени 96,8 илјади евра. На купувачот му обезбедуваат 0,15 отсто од акционерскиот капитал.

Купопродажбата на хартиите од вредност е изведена по пат на блок-трансакција за која информираат од Македонска берза.

Според наведените податоци, единечната цена за акција по која е реализирана трансакцијата е 14.805 денари. Вкупната вредност на блок-трансакцијата е 5.951.610 денари. Инаку, номиналната вредност на акцијата издадена од „Тиквеш“ е 51,13 евра.

Акциите се стекнати по многу повисока цена од пазарната. Разликата е 128,5 насто.

На последниот работен ден од неделата со овие акции се тргувало на официјалниот пазар. Се работи за 41 истргувана акција и како што е заведено во официјалната берзанска листа со датум од 14 ноември, по просечна цена од 6.480 денари. Проследена е со пад од 0,31 отсто. Прометот направен со нив изнесува 265.680 денари, односно над 4.300 евра.