СРБИЈА ПРЕГОВАРА СО РУСИЈА: Росатом сериозен кандидат за изградба на српска нуклеарна централа

Српските власти и руската државна корпорација Росатом започнале разговори за проектот за изградба на нуклеарна централа во Србија, изјави за локалниот медиум „Известија“ српскиот амбасадор во Москва, Момчило Бабиќ. Тој истакна дека може да се очекува напредок во наредните години, пренесува Бизнис.рс.

„Во сериозни преговори сме со Росатом. Не мислам дека има подобра компанија во светот за изградба на нуклеарна централа. Убеден сум дека ќе има напредок во наредните години, бидејќи ни е потребна електрична енергија. Дефинитивно ќе го направиме тоа“, рече Бабиќ.

Порталот потсетува дека во ноември 2024 година, српскиот Парламент го укина мораториумот за изградба на нуклеарни централи, кој беше на сила од 1989 година по несреќата во Чернобил. Одлуката е донесена бидејќи се проценува дека потрошувачката на енергија во земјата ќе се зголеми четирикратно до 2050 година, пренесува eKapija.

Белград во моментов избира партнер за овој стратешки проект, а освен Русија, според руските медиуми, во игра се и Јужна Кореја, Кина и Франција. Во септември оваа година, Владата на Србија потпиша два меморандуми за соработка со јужнокорејската компанија KHNP, додека француската EDF беше ангажирана да спроведе студија за потенцијалот на нуклеарната енергија во земјата.

Според Известија, понудата на Росатом се смета за најповолна бидејќи ги вклучува сите сегменти – од проектирање и изградба, преку снабдување со нуклеарно гориво, до одржување и отстранување на отпад. Како можни опции, како што се вели, се разгледува голема електрана со два реактори VVER-1200 или помали модули од типовите RITM-200 и RITM-400.

Според рускиот портал, се очекува преговорите меѓу Србија и Русија да траат една или две години, по што би следела изградбата. Според досегашната пракса, потсетуваат тие, Росатом би можел да обезбеди и поволен заем за реализација на проектот.

Во текстот се истакнува дека експертите предупредуваат дека Европската Унија би можела да се обиде да го ограничи руското учество, имајќи го предвид процесот на хармонизација на Србија со европското законодавство и притисокот врз Белград да се придружи на санкциите против Москва.

(Фото: talas.rs)