Се препорачува укинување на мерката за работа во смени и од далечина

Владата на Република Македонија, на денешната седница ги прифати препораките на Комисијата за заразни болести за олеснување рестриктивните мерки за спречување на ширење на ковид-19.

Од Владата соопштија дека почнувајќи од 1 јуни, утврдени се следните измени и дополнувања на мерките:

• Се укинува носењето заштитна маска на отворено и се препорачува да се носи кога лицата се во поголема група. Останува задолжителното носење заштитна маска во јавен превоз, такси превоз и во сите затворени простори;
• Се дозволува присуство на публика на спортски натпревари кои се одржуваат на отворено до 30% од вкупниот капацитет на посетители;
• Се укинува забраната за групирање на јавен простор;
• Се дозволува организирање свадби, прослави, веселби на отворен простор (летни тераси) до максимум 100 лица, но не повеќе од 50% од капацитетот на просторот и до максимум 6 лица на маса;
• Се зголемува бројот на лица на една маса во угостителските објекти од 4 лица на 6 лица со обезбедување дистанца помеѓу лицата на масата;
• Се препорачува укинување на мерката за работа во смени и од далечина;
• Продолжува да важи забраната за движење од 24:00 до 04:00 до 15.06.2021 година.