САД сакаат да го „исчистат“ својот пазар од кинески технолошки компании

Американската Федерална комисија за комуникации (FCC) гласаше за одземање на лиценците што ги поседува China Telecom во земјата и вети повеќе чекори за „прочистување“ на американскиот пазар од кинески технолошки компании во име на безбедноста. Ова го објавија западните медиуми, повикувајќи се на резултатот од гласањето на комисијата.

Со 4-0 гласови против поддршката за China Telecom, ќе и биде одземена лиценцата на кинеската компанија во Америка. Причината за ова е што „сопственоста на China Telecom значително ги зголемува ризиците за националната безбедност и за спроведување на законот во САД“.

Компанијата е една од трите водечки телекомуникациски компании во Кина.

„Нашата инспекција покажува дека телекомот работи како подружница на кинеско државно претпријатие и како таква, кинеската влада има способност да влијае и да ги контролира нејзините дејства“, рече вршителот на должноста претседател на FCC, Џесика Розенворсел.

Според регулаторот, присуството на оваа технолошка компанија, како и на многу други во САД, може да доведе до реални проблеми поврзани и со телекомуникациските мрежи и до негативно влијание од Пекинг.

FCC веќе се спротивстави на Huawei, а лиценците за China Unicom Americas, Pacific Networks Corp и нејзината подружница ComNet се пред укинување.

Во јуни, агенцијата предложи забрана за производи од вкупно пет кинески компании, вклучувајќи ги Huawei, производителите на камери за надзор Hangzhou Hikvision Digital Technology и Dahua Technology.

Овие акции ги одразуваат тензиите меѓу Кина и Соединетите Држави кои се појавија во времето на претседателот Доналд Трамп и продолжуваат под политиката на Џо Бајден.