По 1000 денари субвенции на сметката за струја за 45 300 граѓани

Од јануари 45 300 граѓани ќе добијат субвенции на сметките за електрична енергија во висина од 1000 денари. Помошта од државата ќе биде наменета за граѓани од најранливата категорија. Ова е една од мерките која власта ја презема заради високата цена на електричната енергија која се очекува драстично да се зголеми во новата година. Бројот на граѓани чии сметки за електрична енергија ќе бидат финансиски помогнати, во интервју за ТВ ,,Сител” го обелодени заменик-министерот за финансии, Димитар Ковачевски.

,,Во буџетот за 2022 година се определни финансиски средства за енергетските компании и дополнително за 45 300 граѓани кои се од ранливата категорија во буџетот се предвидени 1000 денари за покривање на сметките за струја и огрев, плус веќе се донесени мерки за намалување на ДДВ за потрошувачите на регулираниот пазар со кои ДДВ-то се намалува од 18 на 5 проценти, вели Ковачевски.

Тој посочи и дека веќе се префрлени четири милијарди денари на енергетските компании за производство и за набавка на електрична енергија за задоволување на потребите на регулираниот пазар на малите потрошувачи. Исто така поради енергетската криза сите енергетски компании се задолжени да се вклучат сите капацитети РЕК Битола, Осломеј, ТЕЦ Неготино.

Во меѓувреме цената на електричната енергија на светските берза продолжува да руши рекорди искачувајќи се над 300 евра за MWh.