Запознајте се со GT Sophy – новата вештачка интелигенција на Sony која ги победи луѓето во тркачката игра Gran Turismo

Sony соопшти дека создал агент за вештачка интелигенција наречен Gran Turismo Sophy (GT Sophy) кој успеал да ги победи најдобрите светски возачи на PlayStation симулациската игра за трки Gran Turismo.

„Различни оддели на компанијата Sony работеле на фундаментално истражување за вештачката интелигенција, изработиле хиперреалистичен симулатор за трки во реалниот свет и инфраструктура за масовно вежбање со вештачка интелигенција, за да го подготват GT Sophy за играта“, се вели во соопштението на компанијата.

Вештачката интелигенција првпат се тркаше против четворицата најдобри возачи на Gran Turismo во јули, научи од трката и ги надмина човечките возачи на друга трка во октомври.

„Потребни беа околу 20 PlayStations кои работеа истовремено околу 10 до 12 дена за да го обучат GT Sophy да се трка од нула до натчовечко ниво“, рече Питер Вурман, директор на Sony AI America и водач на тимот кој ја дизајнираше вештачката интелигенција.

Додека вештачката интелигенција досега се користеше за да се поразат луѓето во игрите шах, Mahjong и Go, Sony рече дека беше тешко вештачката интелигенција да го совлада возењето тркачки автомобил, поради многуте одлуки што треба да се донесат во реално време.

Ривалот на Sony, Microsoft, кој неодамна го купи Activision за 69 милијарди долари, користи игри за да ја подобри вештачката интелигенција нудејќи им нови предизвици за решавање на моделите со вештачка интелигенција.

Gran Turismo, видео игра за симулација на трки, го имаше своето деби во 1997 година и беа продадени над 80 милиони игри.

Sony сака да го примени учењето на други игри на PlayStation. „Има многу игри кои претставуваат различни предизвици за вештачката интелигенција и со нетрпение очекуваме да почнеме да работиме на тие проблеми“, рече тој.