Грчки ППЦ со ниски цени ја уривал конкуренцијата – Истрага на ЕК за мајката фирма на ЕДС, кандидатот за универзален снабдувач

Со предаторските цени, со кои ја исклучил конкуренцијата на пазарот, ППЦ – најголемиот грчки снадувач со електрична енергија ги прекршил антимонополските правила на Европската унија. Тоа е ставот на Европската комисија, која утврдила дека компанијата настапувала со цени многу пониски од реалните, со што им попречила на напорите за либерализација на малопродажниот пазар.

Од ППЦ, која е мајка на ЕДС што функционира на македонскиот пазар, веднаш реагираа – наводите на Комисијата се однесуваат на периодот од јули 2013 до 31 декември 2019 година, кога грчкиот пазар на електрична енергија се уште не беше регулиран согласно моделот на ЕУ. И, најважно, нагласуваат, многу пред трансформацијата на ППЦ во модерна компанија за одржлива енергија.

ППЦ е најголемиот играч на грчкот пазар за електрична енергија, во кој државата поседува важен малцински удел. Според ЕК, во периодот од 2013 до 2019 година ППЦ ги контролирал сите капацитети на лигнит и хидроелектраните, како и некои од постројките за производство на природен гас и обновливи извори на енергија. Бил активен и во снабдувањето со енергија на малопродажните и деловните потрошувачи.

Прелиминарниот став на Комисијата е дека ППЦ имал доминантна позиција на меѓусебно поврзаниот грчки пазар на електрична енергија, кој во посочениот период ги опфаќал грчкото копно, јонските и неколку острови во Егејското море.

Во таа насока ЕК изразува прелиминарна загриженост дека помеѓу 2013 и 2019 година ППЦ ја злоупотребил својата доминантна позиција на големопродажниот грчки пазар, затоа што го снабдувал со електричната енергија произведена во сопствените термоцентрали, по цени под нивните варијабилни трошоци.

Од ППЦ наведуваат дека целиот случај започнал со контрола од Комисијата во просториите на компанијата, во февруари 2017, а постапката формално била отворена во март 2021 година. И потенцираат – „ППЦ соработуваше со Комисијата во текот на целиот случај“.

ППЦ ќе продолжи да соработува со Комисијата и ќе ги преземе сите соодветни и неопходни чекори за одбрана на своите права, наведено е во реакцијата објавена на веб-страницата на компанијата.

Инаку, ќерката на грчкиот снабдувач со струја, ЕДС, во мометот е во трка за универзален снабдувач со струја на домаќинствата во Македонија. Во конкуренција е со ЕВН Хоум и ЕСМ. Од ЕДС АД Скопје, кои настапуваат со „Пан Интертрејд“ ДОО Скопје понудија бруто маржа од 11,45 проценти, повисока од другите две понуди.