Германците најбогати во Европа, во Швајцарија секој седми е милионер

Германија е на самиот врв во Европа по личното богатство акумулирано во вредност од повеќе од 16 милијарди евра, покажува студијата на Швајцарскиот институт, во која се нагласува натамошното проширување на јазот меѓу богатите и сиромашните. И покрај падот на економската активност, личното богатство порасна во 2020 година, првата година од пандемијата, според истражувањето на 16 земји од ЕУ и Швајцарија.

Германија ја предводи Европа со лично богатство од 16,4 милијарди евра, а потоа следат Франција со 12,6 милијарди евра и Велика Британија и Италија со по 10 милијарди евра, покажува студијата на Redesigning Financial Services (RSF), институт со седиште во Цирих, пренесува Seebiz.

Реалниот бруто домашен производ на 16 земји од Унијата и Швајцарија се намалил за 6,4 отсто во пандемијата 2020 година, додека личното богатство се зголемило за 3,9 отсто, на рекордни 69 милијарди евра.

Ова покажува дека јазот во богатството меѓу богатите и сиромашните се зголемува, а таквиот тренд ќе продолжи, велат авторите на истражувањето.

Според нивниот извештај за богатството во Европа, Германија забележала и најголем број милионери, 2,9 милиони, а потоа следат Британија и Франција со по 2,5 милиони.

Швајцарија, пак, води по уделот на милионери во вкупниот број на население, кој достигнува 14,1 отсто, што значи дека приближно секој седми граѓанин спаѓа во таа група.

Истражувањето покажа и сè поизразена концентрација на богатство. Така, најбогатите 10 проценти од европските домаќинства поседуваат околу половина од нето богатството на Европа. Најбогатиот еден процент од Европејците поседуваат 19 отсто од вкупното богатство.